1ܣܵܒܵܒ ܕܐܵܗܵܐ؛ ܟܲܕ ܕܒܼܝܼܩܹܐ ܝܘܵܚ ܐܵܗܵܐ ܚܸܠܡܲܬ؛ ܐܲܝܟܼ ܪܲܚܡܹܐ ܕܗَܘܹܐ ܠܗَܘܿܢ ܥܲܠܲܢ؛ ܠܹܐ ܣܵܩܕܵܚ. 2ܐܸܠܵܐ ܪܘܼܦܝܹܐ ܝܘܵܚ ܫܘܼܠܹ̈ܐ ܛܸܫܝܹ̈ܐ ܕܢܚܸܦܬܵܐ؛ ܠܵܐ ܒܸܚܕܵܪܵܐ ܒܝܲܕܘܼܥܘܼܬܵܐ؛ ܘܠܵܐ ܡܲܦܟ̰ܘܼܠܹܐ ܗܹܡܸܙܡܵܢ ܕܐܲܠܵܗܵܐ؛ ܐܸܠܵܐ ܒܓܠܵܝܬܵܐ ܕܣܲܪܲܣܬܘܼܬܵܐ ܡܲܚܫܘܼܚܹܐ ܝܘܵܚ ܓܵܢܲܢ ܠܟܠ ܐܸܢܝܲܬ ܕܒܢܲܝ̈ܢܵܫܵܐ؛ ܩܵܕَܡ ܐܲܠܵܗܵܐ. 3ܐܝܼܢܵܐ ܐܸܢ ܟܘܼܣܝܼܬܵܐ ܝَܠܵܗ̇ ܐܹܘܵܢܓܵܠܝܼܘܿܢ ܕܝܼܲܢ؛ ܒܐܵܢܝܼ ܕܝܼܢܵܐ ܒܸܬܠܵܩܵܐ ܟܘܼܣܝܼܬܵܐ ܝَܠܵܗ̇؛ 4ܕܒܝܼܵܗܝ ܐܲܠܵܗܵܐ ܕܐܵܗܵܐ ܥܵܠܡܵܐ ܡܘܼܣܡܹܠܹܗ ܚܝܼܵܠܹ̈ܐ ܕܠܵܐ ܗܲܡܸܢܵܢܹ̈ܐ؛ ܕܠܵܐ ܙܵܪܸܩ ܥܲܠܵܝܗܝ ܒܲܗܪܵܐ ܕܐܹܘܵܢܓܵܠܝܼܘܿܢ ܕܚܸܩܪܹܗ ܕܡܫܝܼܚܵܐ؛ ܗ̇ܘ ܕܝܼܠܹܗ ܕܡܘܼܬܵܐ ܕܐܲܠܵܗܵܐ. 5ܣܵܒܵܒ ܠܹܐ ܝܘܵܚ ܡܲܟܪܘܼܙܹܐ ܓܵܢܲܢ؛ ܐܸܠܵܐ ܠܡܫܝܼܚܵܐ ܝܼܫܘܿܥ ܡܵܪܲܢ؛ ܘܓܵܢܲܢ ܪܹ̈ܓܵܘܵܬܵܘܟܼܘܿܢ ܒܚܵܬܸܪ ܕܝܼܫܘܿܥ. 6ܣܵܒܵܒ ܐܲܠܵܗܵܐ؛ ܗ̇ܘ ܕܐَܡܝܼܪܹܗ؛ ܡ̣ܢ ܚܘܼܒܼܝܵܐ ܒܲܗܪܵܐ ܙܵܪܸܩ؛ ܗ̇ܘ ܙܪܸܩܠܹܗ ܒܠܸܒܵܘܵܬܲܢ؛ ܠܝܼܵܗَܒܼܵܐ ܒܲܗܪܵܐ ܕܝܕܹܥܬܵܐ ܕܚܸܩܪܹܗ ܕܐܲܠܵܗܵܐ؛ ܒܦܵܬܹܗ ܕܝܼܫܘܿܥ ܡܫܝܼܚܵܐ. 7ܐܝܼܢܵܐ ܐܝܼܬ ܠܲܢ ܐܵܗܵܐ ܚܲܙܝܼܢܵܐ ܒܡܵܐܢܹ̈ܐ ܕܛܝܼܢܵܐ؛ ܕܒܘܼܫܵܝܼܝ ܕܓܘܼܪܘܼܬܵܐ ܕܚܲܝܠܵܐ ܗܵܘܹܐ ܡ̣ܢ ܐܲܠܵܗܵܐ ܘܠܵܐ ܡܸܢܲܢ. 8ܒܟܠ ܡܸܢܕܝܼ ܦܝܵܫܵܐ ܝܘܵܚ ܡܘܼܠܝܼܨܹܐ؛ ܐܸܠܵܐ ܠܵܐ ܡܘܼܥܝܸܩܹܐ؛ ܦܝܵܫܵܐ ܝܘܵܚ ܡܲܥܬܵܠ؛ ܐܸܠܵܐ ܠܵܐ ܩܛܥܝܼܬܵܐ ܗܹܒܼܝܼܲܢ؛ 9ܦܝܵܫܵܐ ܝܘܵܚ ܛܪܝܼܕܹܐ؛ ܐܸܠܵܐ ܠܵܐ ܫܒܼܝܼܩܹܐ؛ ܦܝܵܫܵܐ ܝܘܵܚ ܚܘܼܪܙܸܦܹܐ؛ ܐܸܠܵܐ ܠܵܐ ܬܘܼܠܩܹܐ؛ 10ܒܟܠ ܙܲܒܼܢܵܐ ܡܝܼܬܘܼܬܹܗ ܕܡܵܪܲܢ ܝܼܫܘܿܥ ܒܦܲܓܼܪܲܢ ܛܥܝܼܢܹܐ ܝܘܵܚ؛ ܕܐܘܼܦ ܚܲܝܹ̈ܐ ܕܝܼܫܘܿܥ ܒܦܲܓܼܪܲܢ ܦܵܝܫܝܼ ܓܸܠܝܹܐ. 11ܣܵܒܵܒ ܗܲܡܵܫܵܐ ܐܲܚܢܲܢ ܕܝܼܘܵܚ ܚܵܝܹ̈ܐ؛ ܦܝܵܫܵܐ ܝܘܵܚ ܣܘܼܦܝܹܐ ܠܡܵܘܬܵܐ ܒܚܵܬܸܪ ܕܝܼܫܘܿܥ؛ ܕܐܘܼܦ ܚܲܝܹ̈ܐ ܕܝܼܫܘܿܥ ܦܵܝܫܝܼ ܓܸܠܝܹܐ ܒܐܵܗܵܐ ܦܲܓܼܪܲܢ ܡܵܝܘܿܬܵܐ. 12ܗܲܕܟܼܵܐ ܡܵܘܬܵܐ ܒܝܼܲܢ ܒܸܦܠܵܚܵܐ ܝܠܹܗ؛ ܘܚܲܝܹ̈ܐ ܒܝܼܵܘܟܼܘܿܢ. 13ܒܲܣ ܐܘܼܦ ܐܲܚܢܲܢ ܕܚܲܕَ ܪܘܼܚܵܐ ܕܗܲܝܡܵܢܘܼܬܵܐ ܐܝܼܬ ܠܲܢ؛ ܐܲܝܟܼ ܕܝܼܠܹܗ ܟܬܝܼܒܼܵܐ؛ ܗܘܼܡܸܢܝܼ؛ ܘܣܵܒܵܒ ܕܐܵܗܵܐ ܗܘܼܡܙܸܡܠܝܼ؛ ܐܘܼܦ ܐܲܚܢܲܢ ܗܲܡܘܼܢܹܐ ܝܘܵܚ؛ ܒܘܼܬ ܕܐܵܗܵܐ ܐܘܼܦ ܗܲܡܙܘܼܡܹܐ ܝܘܵܚ؛ 14ܟܲܕ ܒܝܼܕܲܥܝܵܐ ܝܘܵܚ ܕܗ̇ܘ ܕܡܘܼܩܸܡܠܹܗ ܠܡܵܪܲܢ ܝܼܫܘܿܥ؛ ܐܘܼܦ ܐܸܠܲܢ ܥܲܡ ܝܼܫܘܿܥ ܒܸܬ ܡܲܩܸܡ؛ ܘܒܸܬ ܡܲܝܬَܝܹܐ ܠܲܢ ܥܲܡܵܘܟܼܘܿܢ (ܠܟܸܣܠܹܗ). 15ܣܵܒܵܒ ܟܠ ܡܸܢܕܝܼ ܒܚܵܬܸܪ ܕܝܼܵܘܟܼܘܿܢ ܝܼܠܹܗ؛ ܕܟܲܕ ܙܵܝܕܵܐ ܫܵܦܵܩܲܬ ܒܝܲܕ ܪܵܒܵܐ؛ ܡܲܙܝܸܕܵܐ ܫܵܟܲܪܬܵܐ ܠܚܸܩܪܵܐ ܕܐܲܠܵܗܵܐ. 16ܒܘܼܬ ܕܐܵܗܵܐ ܠܹܐ ܣܵܩܕܵܚ. ܣܵܒܵܒ ܐܵܦܸܢ ܕܒܲܪܢܵܫܲܢ ܒܲܪܵܝܵܐ ܒܸܚܪܵܒܼܵܐ ܝܠܹܗ؛ ܐܸܠܵܐ ܗ̇ܘ ܕܝܼܠܹܗ ܓܵܘܵܝܵܐ ܦܝܵܫܵܐ ܝܠܹܗ ܚܘܼܕܸܬܵܐ ܝܵܘܡܵܐ ܡ̣ܢ ܝܵܘܡܵܐ. 17ܣܵܒܵܒ ܐܘܼܠܨܵܢܲܢ ܩܵܠܘܿܠܵܐ ܕܝܼܠܹܗ ܕܛܲܪܦܲܛܬܵܐ ܕܥܲܝܢܵܐ؛ ܚܸܩܪܵܐ ܓܘܼܪܵܐ ܕܠܵܐ ܩܲܝܵܣ ܠܥܵܠܲܡ ܗܵܕܘܿܪܲܢ ܝܼܠܹܗ؛ 18ܕܠܹܐ ܝܘܵܚ ܒܸܚܝܵܪܵܐ ܒܐܲܢܹܐ ܡܸܢܕܝܵܢܹ̈ܐ ܕܦܝܵܫܵܐ ܝܢܵܐ ܚܸܙܝܹܐ؛ ܐܸܠܵܐ ܒܐܵܢܝܼ ܕܠܹܐ ܦܵܝܫܝܼ ܚܸܙܝܹܐ؛ ܣܵܒܵܒ ܐܵܢܝܼ ܕܦܵܝܫܝܼ ܚܸܙܝܹܐ ܕܙܲܒܼܢܵܐ ܝܢܵܐ؛ ܐܝܼܢܵܐ ܐܵܢܝܼ ܕܠܹܐ ܦܵܝܫܝܼ ܚܸܙܝܹܐ؛ ܠܥܵܠܲܡ ܝܼܢܵܐ.